MX Радио

Во Скопје синоќа свечено е отворена американската амбасада, едно од најголемите претставништва на САД во Европа. Амбасадата се наоѓа на скопското Кале на површина од над осум илјади метри квадратни и се смета за најголема амбасада на Балканот.

Охрид е меѓу првите , ако не и единствената општина, засега, во која одредбите на  Законот за јавна чистота се применува и во делот на ангажирањето, од страна на општините, на посебно задолжени лица - комунални редари.

Чинот на свеченото затворање на Фестивалот на францускиот филм ќе биде в сабота на 4. јули во 20 часот во Центарот за култура „Григор Прличев" каде што во неделата беше и отворено годинешното, второ издание на Фестивалот.

Од денес до недела во хотел Метропол - Охрид ќе се одржи Шестата меѓународна конференција за преведувачи и толкувачи на PROZ.COM.

PROZ.COM претставува платформа за преведувачи и толкувачи заснована на интернет и е најголемата база на контакти од преведувачи за сите светски јазици. Во поканата која ја испрати до можните учесници нагласи дека доаѓањето во Охрид  „ Не е само учество на конференцијата, туку тоа е и  краток излет во светот на богата култура, долговековна историја  и вдишување на природна убавина".

42-рата летна школа на Меѓународниот семинар за македонски јазик, литература и култура ќе се одржи во Охрид од 10 до 27 август 2009 година во организација на Универзитетот  „ Св. Кирил и Методиј " од Скопје.  Основата на програмата ја сочинуваат лекторските вежби, предавања од областа на јазикот, литературата и културата, како и низа изборни курсеви од различни области.

Видео-приказната за "Охрид-град на светлината", од денеска се емитува на најголемата светска ТВ- мрежа, CNN, а ќе се промовира и на повеќе канали низ Европа и ќе послужи за промовирање на земјава и во наредните туристички сезони.Шеесет секундниот промотивен спот е снимен на локациите Плаошник, село Трпејца, Свети Наум, Света Перивлепта, стариот град, куќата на Робевци, а во него учествуваат Каролина Гочева, Мето Jовановски и Николина Кујача. Кореографијата е на Рисима Рисимкин.

Еколошкото друштво "Грашница" изразува загриженост за статусот на Охрид во УНЕСКО, откако светската организација неодамна од листата на заштитено светско природно и културно наследство го избриша германскиот град Дрезден, поради човечка негрижа.